Eendunge Emona: Ismael Neumbo

Pomukunda Onandiva popepi nOngha yaNanghonda, opa kala omunyeumbo Mbishi yaShuudifonya, omunyeumbo ngaho e li peedula dokuungula oushimba natango.

Mbishi okwa kala nomukulujadi waye Hinandunge yaNghilengwa, okakulujadi ka li po kawa kawa, omunhu a kasha ngaho nde natango okwa fa ashike ehelende.

Oinima ohai ningwa. Omunyeumbo Mbishi nge e li koilonga mboli ha pe na ashike Katamba kaHaufiku umwe ha di kOkashekele heya okuteyapo onduda yaye nge e li komaonda?

Oshili ihashi hondama wo oumbudi ihau yofwa, okafekela nomapopyo osho e lihanene omukunda aushe nomidingonoko dopondingandinga, unene owa ka tandavela tau endelele eshi wa fika momatwi a Nahambo yaShipa, okakulukadi ka li po kokandjanga mutwe ngaha.

Omufofodolo wa fika nomimatwi a mwene womakuva. Mbishi omulumenhu iha kukuka. Naye mwene oha ti: " ame ihandi kakama oumbada shapo outalala tau ya".

Eshi a uda onghundana ei okwa tokola opo a konge ondunge yokulimonena oushili ye mwene.

Oshikando shimwe eshi eya po okweya a tula mo efudo lile kashona. Nokonima yohani noivike lwaapo okwa lekela nekulu laye kutya ye ota shuna kouxwi.

Ondjaya yalya onghuta, yaya medimo londjila. Ondjaya ha ya ya ashike komukunda umwe ha ku tiwa okOnamutanda yo otai aluka konguloshi. Okwa kala née a teelela Katamba euye, aaye efiku eli nghene alele ousho kugena. Efiku etitatu nalo osho. Etine opo ngaho elipo, fiku olo meumbo inamu xungilwa ounona ovatelwatelwa monduda vakanangale, Katamba eya.

Meenhundumene mwinya Katamba ashuna, mwene weumbo teya meumbo. Tapula oimbale ituulwe, shaashi vati inava ka ya vali kumboyo ou kwali tava i naye okwa teka.

Oimbale tai tuulwa, manga ngaho ina tameka oilonga ye ota ningi afa a haluka kashona ye ota ti shike? Ta eta okutwi kwaye pumukwaanyoka lwaapa afa eudite ewi lasha shili, ye tati: lye? Katamba eli? Paife ovafa née tave linyamukula nongenga shinya. Ug omukulukadi angwangwana oshilyo sholutu laye shemulopota...