Efyo noluhepo ashishe shimwe: Jackson Wayulia Wahengo

Mandume eshi a mona kutya kape na vali omhito imwe, okwa popya ta ti "Nena tuu eli oshilongo eshi otashi mono mwene. Ye nee mwene washo oye ou te shi file." Opo nee Mandume okwa lombwela ovamati vaye tati: Teeleleni, ame nandi umbe tete, opo nee tamu hovele okuumba." Mandume ye mwene okwa li ha umbu lela. Waye ngee wa topa oholo yao ihai wile pedu nande, okomunhu ashike.

Hano manga ohamba yokapekwa yaMelulo ya li po tai lapeke ekundu komesho yayo, nani mboli oholo yomutondi ye mu xutuka ndele tai mu kumu okuyukilila medimo. Nokudja opo ohamba inai dula vali okuninga sha.Omalenga aye okwe mu humbata po, shaashi ka kwali afya pefimbo olo. Opena ehepu limwe tali tongo kombinga yefyo laMandume mOshiingilsha la tolokwa ku Keiling(Jornal de Angola,18 de Abril de 1994p.11) Ehepu otaliti eshi Mandume a mona kutya kapa li vali omhito yokuxupa momake ovatondi vaye,okwa pungululila oshipala shaye kovana ovamati vanakufya, ohamba Weyulu ndele te va pula ngeenge vo ova hala okuninga oihakanwa yoindele oyo. ngaashi vo ve shi tya kutya, vo ova hoolola po okufya, shi dule okukala oihakanwa yovatilyane. Eshi ve shi tya ye Mandume ota vilula outa waye, te u ulike moipala yavo aveshe vavali, omo wa topela. nolwaxuuninwa, outa okwe u liulika ye mwene ndele wa topa. Ola li eti-6 Februali 1917 a fiya po oshilongo shaye pamwe novakwaita vaye ve dule 30,va fininikilwa ketanga laMatt J.de Jager"