Shafodino: Ismael Neumbo

Shafodino shaHidishange okwa li omumati woshipombolutu, omumati ali po woshiyenyamunhu.

Ngaashi naanaa ovamati aveshe ile vahapu vepipi laye hava ningi, Shafodino fiku limwe manga ngaho etango ta li tu ongolo ngahenya ye ota i eke li ufe momaulu shashikula eshi e liendifa omakaeliteekwa ye te lishamine ombode inyika nawa oyo afiilwa kuNamholo eshi a li eyapo a dja komaonda kediva lamutumbwa nashikoto oko eli halongele ombulu imwe yedina mnr Jan van de Merwe.

Hano mangha shafodino a li ta kunghula nongubu yomunyeumbo Vatilifa yaNghuutete nomokanangula ngaho taka tyava. Oka li okakadona kawakawa kafa kamhelwa peke, okaima komamumesho afa eembutu, eemhafu dako ongomupalala tau hape, okanhu komayoo matoka tootoo afa oitandu yeendao, okayulu oke lipo kahonga nomupolo muwa muwa watwa.
Okakadona aka Shangeelao shaWeliile ito ka tale ukale ino keuka luvali, shaashi nge ke ku pilamene oto ti naka aluke ko nge ka menyemo oto ti nakayole vali.

Shafodino omumati a li iha kwataakwata, vati oikwataakwata ohai nyika edilo, shafodino okwa ehena puko ndele te ka popifa nefimaneko: Wa uhalapo kaume? Owe lipyakidila mbela nandi uye tu tyave ko?

Shangeelao: Ehee ove wauhala? Aaye tangi ngaho kakele oya wana paife ohandi mange ngaha ndiye keumbo okwa toka paife na ondina oinakuwanifwa ihapu keumbo.

Shafodino: ohoo, eewa hano shiveli, ame omuwndanandjila ngaho handi kongo oyonghwandabi detu da kana do tadi dumwa ngaho kutya oda monika dayuka ombululu ei yaNamahoka nEenghango, shitiwa ove ino mona nande eengobe ta di li endele? Muna eengobe domalonda naimwe ilaula ofidi iwa nokuonda okaadona kawa ngaave ngaho?

Shangeelao: aaye inandi umba nande oyo ongobe omesho, ye omweendanandjila kena edina?

Shafodino: Aame Shafodino shaHidishange koShela shaMwalyako shiveli, ko okakadona kena ouwa watwa kekipa olye aka?
Shangeelao: Aame Shangeelao shaWeliile yaNghiikovali.
Shafodino: tangi eshi twe lishiiva, oto kwafange mbela u ka vatelenge owiva vokunwa ndi tutike ngaho omhumba shaashi onda loloka nai.

Shangeelao okwa dimina opo va ende pamwe nomumati ou womweendanandjila e ke mu pe omeva keumbo. Omumati ota nyika nawa momayulu aShangeelao shimwe to nyengwa. Osheshi ashike Shangeelao okakadona katekulwa naashi ngaho nee oxuxwa yonghadi ihai lili ngeno oshili omhito ei kaifi kuefiwa.
Shafodino anwa, amona apa hapa di Shangeelao, ye ta twikile olukongo laye leengobe loipupulu.
Mafiku kemale eshi shafodino va ka shakena vali nokakadona aka, efiku eli aveshe vavali ova popifafana nohamu, ye Shangeelao ta pula nge Shafodino osho a monene eengobe daye. Shafodino epulo leengobe ine li nyamukula okwe likolomona ashike nde tati: Ombili ngaho kaume Shangeelao pamwe ohandi endelele unene ashike ame onda itavela nomutima wange aushe kutya oikwataakwata ohai nyika edilo vali yatetekela ihai nu omeva onata, vali vati leenda ongula olo litoola oshima. Ame oku dja ngaho efiku ndekumona tete omaufiku ange okwa kala aninga ale, eemhofi oda ninga omafiku da londokange ndele mouluvi wange kamuna shimwe shihefi ove. Onda ninga omafiku handi ningi omapupatwi ndafa ndi udite ewi loye naasho ohashi eta omatwi ange e linyenge afa okakambe kauda ewi lamwene.

 Eshi ndahala oku ku lombwela apa okutya ame owa kuma nge komutima neke loye litalala na eenyala doye oda fiyako oshilimbo, sho osho shaetifange pondodo oyo ndi uye ndikupule opo uningepo oshitenya shovakulunhu vange.

Shafodino okwa mwena po ye ta tula oshenyo ewete e litula omutengi mudjuu wali monhulo yaye. Shangeelao okwa fuda ombeu nde tati: Ombili ngaho kaume Shafodino ashike nge onda pwikikina nawa onda uda toti oshinima eshi owa ninga nasho efimbo momutima, naame ohandi ku pula née opo upenge omhito ndike lipule eshi wapopya apa ame handi ku pe nee nawa enyamukulo loye.

Aaye omafiku kemale a pitapo eshi ooShafodino naShangeelao vapanga oukaume. Ovali veholafane shili.

Efiku limwe Shafodino okwa lombwela kaume kaye Hekoto opo vaka talelepo okakadona kaye ye eve lishiivife. Hekoto mokumona Shangeelao okwa li atwila meni nayi nokwa tokola opo a teyepo oukaume ou. Omuhongololi oku dule omulodi.

Hano née konima ngaho yomafiku a paula eke limwe ye Hekoto oteya puShafodino tati menhu wameme vati eheku lombwele kefi woye do vali da londoka ihadi i oita. Kakadona woye osho nde mu udikika, oludi olo ohali tula ovanhu mo........... takamifa nongeenge oto tu omhata tala ashike fiku tokanangala nako kutya otomono take ku pamhadala kumundingo oku. Shafodino okwa li awa pedu mokushi uda, kali ngaho ahala oku itavela kakele okushishi ngaho kutya omuhalombwelwa ohai noinima ii povanhu shili.

Eshi tuu Hekoto adja apa ye oku fike pona ayuka kuShangeelao, ye ote mu lombwele kutya ndenge yange ondishiahi kutya ouhole Shafodino, eume Lange shili lopofingo ashike ondishishi kutya okuna oshinima shimwe inoshi mona natango ashike ondishi kutya ito keshi panda nge weshimono, Shafodino oku na omushila. Shangeelao ye omesho okwa pwa mo. Nge omhata telela ashike eku pule muka nangale, kendabala umupamhadale komatako, ite ku efeleko nongeenge ou na elao nde tohange wa tanganana owe u kwata osho.

Shangeelao oka tameka ngaho née taka kwenauka kewete kena omupya ko kateelela ngaho née efiku olo lifike opo ka mone oukwashili.

Shekunangela oshina ounongo woku kulya, ngaashi sha fanekwa ku Hekoto osho sha enda.

Ovalihokwi Ava vavali osho vadimine va nangale pamwe, omafuma ngaho taayolele oulipamwe, keshe umwe shaye Oshi li medimo nokwa hala okumona oukwashili. Eshi ngaho vanangala Shangeelao i na kwataakwata okwa fikila ayukifa eenyala daye koshinika shaShafodino oku lo elume shaashi ola lombwelwa nawa ta li punguluka. Ai, oshafa oshili. Ko take mu efa a pwilemo, taka yuka ko vali ka endelela kashona, lo Shafodino kombete ola nhuka ko. Oho ningi ovanhu shike? Oumulodi hamba ngoo shili? Inandi hala novali nokuli ondeya eshi.

Shangeelao nako ina ka efa diye ina di umbilwa oka ti: Inda kwinya shiimaave watya eshila olo. Oukaume watewa, kaume koye oye omutondi woye onghene kotokeleni ookaume voludi eli.

  

 Shafodino oufiku oo okwa kala ngaho nee haningi a taakele kofindo, ataalele koshivelo, aduduluka po pombete ta kala omutumba, ye te likwata mombaba yoshipala shaashi oha kwatwa po nokomutwe woshipwataula hau ya ngaho oo tau shuna, eemhofi ode mu londoka filufilu ohaluka eluwa latenda.

Efiku eli okwa pita ongula yoshimati, tai aka endaaende mekove shaashi ka li naanaa ahala okupopya nomunhu. Okwa hala okukonga ondungedilaadilo oyo ta nyikifa yo nayo Hekoto oulayi.

Hekoto keumbo naye oku liko ta tula oinima yaye peenhele. Ombaapila yaye okwe i futinina muimwe inai shangwa sha oyo a ninga ekutu ndele ta laima ko nongha yomangongwa eenyandi. Okwe i pa nee okandenge Nghiitangaleke opo ke ke i fikife kuShangeelao eshi tava i kenhongelo shaashi ova li mongudu imwe.

Shafodino okwa tokola opo oshinima eshi eheshi dodongele nokwa hala a tale kutya otashi i fiyo openi.

Okwa tokola a pange oukaume nakahewa waShangeelao, ehewa naanaa laye e li lokoikuni nomeva. Kahewa kaShangeelao ou wedina Ndalimbwa okwa kala ngaho kwali ha udu Shafodino ta tongwa nde i ne mu shakeneka nande kwali. Ye Shafodino naye kefi okatana edina okwe li lundulula, oye Tuukumweni yaNelongo nge ve li naNdalimbwa.

Omukanda waShangeelao wafika, okwa li shidjuu kuye shili, keshi naanaa eshi ena okuninga. Unene tuu eshi ooShafodino kwa li ihava di pamwe naHekoto.

Hekoto oshimenhu sha li po shokashendjelutu, omumati ena oufuuli watwa kekipa shaashi nande ota penduka oto ti ota dipo, oufuuli ngaho oo wooIsak yatate oo. Onghee ihe li vondo naanaa okuanywa kounangula, omutwifa olwisho nayi.

Hekoto oshe mu pula ngaho efimbo nolule kashona oku undula emanya, ashike hewa osho ngoo lau. Okwa li a hafela ondunge yaye nokwa pula nee Shangeelao opo oshinima shavo shi ha fike nande momatwi a Shafodino.

Oku Shafodino vo naKaNdalimbwa oukaume otau ende nawa, paife ova ikafana nova hovela nale okupopya oinima yopaumwene nokuli.

Efiku limwe Shafodino okwa pula okakadona kamwe ka li meumbo lavo kokatekulu kaxe kemushangele ombapila yafa ngeno yadja kuShangeelao ya uka kuHekoto kutya neuyeko fiku olo.

Osho sha ningwa naHekoto ombapila ei okwe i pa Ndalimbwa ei pe ooNghiitangaleke okandenge kaHekoto nokwemu kunghilila i ha monike nande okulye, shaashi oyopaumweneelela, okwa ti nokaana kaye komomutima ina ke i mona. Shininga ombwa, omunhu weemhadi mbali ote shi ku ningi.

Omukanda waHekoto we my fika, enyaku kuye okwa li okambushi meumbo mwa tomwa, naashi ta ende otayolifa ngoo nee needi, ye he lidenge monhulo, oku wete née paife lela kutya eembwa da kwata odaye nopehena vali omukweshe washa.
Okwa kala nee ewete taku anye okuwiwila opo a shiive e lidenge ondjila yaNamahoka ashiive a ka tokelwe nokunangala mouyamba wokamufudo ta ka di momayulu okanangula oko kawa kawa kafa ta ka liwa.

Kwinya Shafodino ota lifa ashike omunyeumbo Weliile xe yaShangeelao, oo a li ngaho ta ke outi vaye mekove ashiive a ka fitike okanyongo kaShituna waye. Shafodino okwa popya mokule afa talombwele omunhu ve li naye kutya oteya a nangale kokakadona kaye komooWeliile ashike ina tumbula nande edina lako. Omwa li nee muna oukadona vatatu. Mwa li Nghipalendjila ou a shikula Shangeelao naKambweshe a li mo nghee a tekulwa mo okudja eshi a kufwa kevele.

Weliile omushamane a li iha danenwa, okwa li ena onyati nongeenge okwe ku kwatele omunhu ona fiye po sha ngoo nge ota ende kashona.
Omunyeumbo Weliile moku uda oshinima shatya ngaha okwa li ewete ofa ye li eta komutemo nonande paushili ei oyo omangela yaShafodino okukotokela Hekoto.

Tate Weliile eshi a lya ouvalelo okwa vilikila kutya fiku olo itaku xungilwa ovanhu ove na okunangala diva shaashi vati okwa uda ehokololo looHambido kailaana da holoka poixwa yavo.

Eshi tuu aveshe va ka nangala ye ndjai ota kufa oiti yaye a ka nangale moipundi yaye polipale. Efiku eli odula okwa li ya didimika no omunhu Ito dulu okumona kokule nonande omwedi owa li una okukala wapita efimbo olo.

Opa pita ngaho okalweede ohaluka omunyeumbo oku udite eshi epeta olo ha li idile ponhu yaye le linyenga, ye ota koko onghunya yaye. Shafodino ye ota piti polipale apa a finda komitala doukadona. Omunyeumbo ndishi okwa hangika a londwela aveshe opo vaye noundolondolo voku talaleka meenduda davo? Hano keshe pomutala wokakadona okwa tela po nee omwiyo, eemwiyo dinya hadi telwa oifitukuti domamuyoo oitenda yakola enya.

Shafodino ndishi momukanda waye okwa pukululikika, hano ota ende nee tafifile auka ponduda opo a pukululwa, eshi tuu a ka tya ngaha ye momwiyo omo e li. Ye onghuwo okwei ekelamo.

Omunyeumbo okweya ta tondoka noshikulumwati nde Hekoto teshi pewa nee kondjaya. Ovaneumbo aveshe ova penduka vatale eume e li ta li yayaana kutya olaapeni nota li kongo shike meenhundumene doufiku. Shangeelao okwa li afya Hekoto ounye nokwa tokola ahapopye tuu vali naye okudja kefiku olo. Ohatu twikileiko natango.

Shafodino eshi mukwao ta pewa Nambwa ye ota vambele ashike meendidolo dongadjo e li mepya tafi oingungumina. Ou Hekoto momwiyo osho ngaho a kufwamo, ye ta pulwa nee ombaxu nokavava eshi ta kongo omaufiku, okwa kala ashike a fidimana oumbudi no ita popisha.

Elume osho la efwa liye, omupongo onghee nee a shongola auka momilema omo ye ta luluma nee eedimbo daWeliile.

Eshi kwasha Shafodino okwa ka talelapo eume laye ye a ude eshi ta li ka tya. Okwa hanga ngaho ta li mewaamewa nomeva mapyu kokandenge Nghiitangaleke. Eshi e mu pula eshi sha enda mongava eshi ya ninga ondalashe okwa ti okwa lwifwa kovalumenhu vatano naumwe vemuhangakena ngonguloshi vati ta di kokino ya li kooNghuulile kOngha. Oiveta nee ei a ningwa komwiyo pomhando naye okwati keshishi, menhu wameme olwoodi linya ka la li tali nuwa omeva, osho e lipopila.

Apa Shafodino oha ningi ngaho a etele eume laye onghenda ye a kwatwa koindjola, oha ningi nee hai pondje mangha a ka yole nge omapunga ayada ye ta aluka ngaho.

Shafodino omulumenhu a kosha omutwe, inga vati hashiti she ku nyekele ohala oho ende po tofifila, vali vati wa pukile utila ofuka ove ou wa wile utila okulonda.

Shafodino ina hala okukanifa oukaume wavo naHekoto ashike okwa hala oku mu longa oshilongwa noku fimaneka yo oshipango oshitimulongo.

Eshi ngaho Hekoto a veluka ye Hendunge ota yeke Ndalimbwa, kahewa kaShangeelao a shiive ondjabi keumbo lavo. Ndalimbwa okakadona ke na ondede omhito i li ngaha itake i mono luvali.
Ngaashi sha dilaadilwa osho sha ningwa, kape na malimbililo ooShangeelao ovo oovene vavo na kapena ou temu keelele okuya kondjabi yaNdalimbwa, pokati kavo ito wana po vali nomeva iha a piti po.

Komatango nee kwinya ye Shafodino a hangika ngaho a lombwela eume laye kutya ove na oku ka tokelwa kondjabi yonhumba oko ku na okanangula a hala oku popya nako, osho sha ningwa, ovamati vaya kondjabi.

Eendunge emona! Shafodino eshi veya peumbo opo ye ota pula Naifunde okanghelo kooNdalimbwa ke ke mu ifane. Ndalimbwa okwa li anyakukwa mo ku mona Shafodino. Okwa ka ifana nee ehewa laye lopofingo Shangeelao opo e ve lishiivife naShafodino. Shangeelao okwa kala efimbo ha udu Tuukumweni ta popiwa kuNdalimbwa nokwa kala emu lolokela oku mu shakeneka. 

Shangeelao nghene a udu Tuukumweni e li komukala ina kwataakwata nokuli ye okwa fika, atye tuu ngaha omunhu ou ta ulwa Tuukumweni o Shafodino noponho yaye oyou a ditaulwa mafiku aa needimbo kuxe.

Shangeelao: Wa tokelwa po Shafodi? Hamba edina loye limwe oove Tuukumweni? Nghali nande nde li uda nale. Shafodino okwa dimina ye ta menyemo kashona eshi atala momesho a Shangeelao oo taa vemene meenhe dohani. Shangeelao okwa popifayo Hekoto omolwa eenghoto ye Hekoto ta ngonene ngaho mokumyamukula.

Ndalimbwa okwa li a kumwa moku uda kutya Tuukumweni oye Shafodino. Okwa pula née kutya kaanave nghene twa kala oove Shafodino?
Shafodino: Eheno kaume Ndalimbwa, ame mwene efimbo nda li Shafodino okwa li ndina okakadona kawa noka li ka wapalela omwenyo wange fiyo osheshi ka ka didilika kutya ondi na omushila ame handi didilikeyo kutya epata lavo ohali li shuna pondje, hava tula ovanhu mo......., okudja eshi twe litopoka ondaya povanhu opo ndi tetwe omushila shaashi onda didilika yo kutya nako oulodi muko kaumo vali.

Opo nee Nda dja nda ninga (ounyuni) Tuukumweni shaashi omunhu ou a mona omushila wange oye naanaa a mona oulodi womuholike wange, ohaluka naye a twala ko oihole yaye ile pamwe ye mo........ Omo ehole walye.

Apa Hekoto oku li po ashike tapakauma kelengwa, ahala ashike ngeno okwa shita medu.

Shangeelao moku di uda okwa hovela ashike okukwena, okwa papatela Shafodino ndele te lipwipwike muye, muye kamu na ondjovo yasha, mokanya kaye kamwa li nande ete lasha mokushiiva oukwashili.

Didilika: kaume koye ote ku lifapo nyoko.
- Ekoto oha li endele pamwe noulai.
- Shininga ombwa, omunhu weemhadi oteshi ku ningi.
- Kalunga eshi e ku pa iheshi lipo! Tokelweipo nawa...... :-)